எல்லா சமூகத்தினராலும் அவரவர்களின் சமயத் தலைவர்களுக்கென தனி மதிப்பும் மரியாதையும் வழங்கப்படும்போது முஸ்லிம்களின் மார்க்க தலைமையான உலமாசபைக்கு மாத்திரம் முஸ்லிம்களினாலேயே பலத்த விமர்சனமும், தேவையற்ற குற்றச்சாட்டுக்களும் முன்வைக்கப்படுவது கவலைக்குரியதாகும். உண்மையில் ஏனையவர்களைவிடவும் சமூகம் தொடர்பாக அதிக பொறுப்புணர்வோடு செயற்படுபவர்கள் இந்த உலமாசபை என்பதை நாம் புரிந்து கொள்ள வேண்டும். இதை எங்களைவிடவும் மாற்று மதத்தவர்கள் நன்கறிந்து வைத்துள்ளனர்.
முஸ்லிம்கள் பாதுகாப்பு ரீதியாக மிகவும் அச்சுருத்தலுக்குள்ளாகி இருக்கும் இந்த இக்கட்டான காலத்தில் சமூகப் பாதுகாப்பு தொடர்பாக மிகவும் கவலையோடும், பிரார்த்தனையோடும் 24 மணிநேரமும் தங்களாலான சகல முயற்சிகளையும் செய்து கொண்டே இருக்கின்றனர். அலுத்கம தொடக்கம் மினுவாங்கொடை வரையில் இடம்பெற்ற வன்முறைகளின்மூலம் மீண்டுமொரு முறை இனக்கலவரத்தை ஏற்படுத்தி முஸ்லிம்களை அடியோடொழிக்க எத்தனிக்கும் சில கடும்போக்கு வாதிகளின் பல சதித்திட்டங்கள் முறியடிக்கப்பட்டதில் இவர்களின் பங்களிப்பு அளப்பெரியது.
தற்போது உலகம் பூராகவும் பேசப்படும் வரலாற்று முக்கியத்துவமிக்க சம்பவமாக வர்ணிக்கப்படும் முஸ்லிம் அரசியல்வாதிகளின் ஒற்றுமைக்கு பிரதான வழிகாட்டியும் இவர்கள்தான் என்பது எத்தனை பேருக்கு தெரியும்? ஞானசார தேரர் காலக்கெடு விதித்த அன்றைய தினமே கட்சி கொள்கையாலும் கருத்து முரண்பாட்டாலும் பிரிந்திருந்த அனைத்து முஸ்லிம் அரசியல்வாதிகளையும் அவசரஅவசரமாக அழைத்து சமூகப் பாதுகாப்புக்காக அனைவரும் ஒன்றிணைய வேண்டியதன் அவசியத்தை மிகவும் உருக்கமாக வேண்டிக் கொள்ளப்பட்டதன் விளைவே இன்றைய ஒற்றுமையாகும். இருந்தும் நடைமுறைப் பிரச்சினை கருதி இதுவரை இது தொடர்பாக பகிரங்கப்படுத்தவில்லை. அத்தோடு இவர்களின் செயற்பாடுகள் இறை திருப்தியையும், சமூக நலனையும் மாத்திரம் நோக்காக கொண்டிருப்பதனால் விளம்பரங்களோ ஆரவாரமோ கொண்டதாக இருப்பதில்லை. மீடியாக்களில் மாத்திரம் தகவல்களை எதிர்பார்க்கும் பலருக்கு இவர்களின் செயற்பாடுகள் சென்றடைவதுமில்லை.
இதன் காரணமாகவே இவர்கள் மீதான விமர்சனமும், அவமதிப்பும் (கற்றவர்களால்கூட) தொடர்ந்த வண்ணமுள்ளன.
எனவே இந்நிலை மாற வேண்டும். அரயல்வாதிகளை விமர்சனம் செய்வதுபோல் எடுத்ததற்கெல்லாம் உலமா சபையையும் விமர்சனம் செய்வதை தவிர்க்க வேண்டும். அவர்களின் பணியை அவர்களால் முடிந்தவரை சிறப்பாக செய்கின்றனர். அல்லாஹ்விடத்தில் அவர்களுக்கென உயர்ந்த அந்தஷ்த்துண்டு என்பதையும் மறந்துவிடக் கூடாது.
நளீம் றம்சாத்.
